重點說在前：選科之前，你要先明白 6 件事
1. DSE 選科，最現實嘅目標係「考到需要嘅成績」
選科唔只係問自己「我鍾唔鍾意呢科」，更加要考慮：
呢一科可唔可以幫你喺 DSE 考到一個足夠好嘅成績，帶你去下一個升學目標？
對大部分重視選科嘅同學而言，目標好可能係香港八大院校，或者同級別嘅海外大學。因此，選科唔應該只係憑感覺，而係要同時考慮自己能力、學習模式同考試表現。
2. 如果你怕背書、怕寫 Essay 論述題，BAFS 值得你了解
如果你覺得：
- 文科要背好多書、寫好多 Essay，好辛苦；
- 理科概念太抽象，理解上有困難；
- 你想讀一科較重視邏輯、計算、有步驟可以依隨，操練係有回報既科目；
咁 BAFS，特別係會計單元，會係一個值得你認真考慮嘅選擇。
3. 唔好太早用「將來想做咩職業」決定高中選科
好多中三同學會問：「如果我將來想做某某行業，中學係咪一定要讀某科？」
但其實，中三階段未必需要太早將選科同未來職業直接掛鈎。更重要嘅問題應該係：
呢一科，係咪你有機會讀得好、考得好，幫你入到想入嘅大學課程？
4. 唔好因為「大學想讀商科」就必然選 BAFS
大學想讀商科，並不代表中學一定要選修 BAFS。香港大學商學院一般並無要求考生必須修讀 BAFS、經濟或者旅遊與款待先可以報讀商科課程。
所以，揀 BAFS 嘅原因唔應該係「我大學想讀 Business」，而應該係：
我是否適合 BAFS 嘅學習模式？我是否有能力喺 DSE 用呢科考到好成績？
5. 你要先知道學校開設邊一個 BAFS 單元
BAFS 分為兩個學習範疇：
- 會計 Accounting
- 管理 Management
大部分學校只會開其中一個單元，極少數學校會同時開兩個。因此，選科之前你一定要問清楚：
你學校開嘅 BAFS，究竟係會計，定係管理？
因為兩個方向嘅學習內容同考試模式，可以有好大分別。
6. 最適切嘅考慮點：你能否讀好、考好呢一科
總結而言，選 BAFS 最應該考慮嘅問題係：
- 你學校開設嘅係 BAFS 會計，定係 BAFS 管理？
- 你是否適合呢科嘅學習模式？
- 你是否有能力透過呢科喺 DSE 考到理想成績？
- 呢科會否幫你踏進下一個升學目標？
(下集待續...)