六、WHO：BAFS 會計適合邊類同學？
根據我自己當年選科經驗，
以及由 2013 年任教至今嘅觀察，我會咁樣總結。
✅ 適合選 BAFS 會計嘅同學
1. 願意操題目、做數嘅同學
會計唔係靠望一次 Notes 就會識。你需要透過大量練習，熟習每一個題型同處理步驟。
如果你願意操 By-topic Past Paper，願意一次又一次修正錯誤，BAFS 會計會比較適合你。
2. 願意理解邏輯，而唔係死記硬背嘅同學
會計背後有一套清晰邏輯。每個交易既入帳方式，記錄去邊個帳戶都有跡可尋。但又不涉及理科既抽象思維，或者做實驗去驗證某事物是否真確 / 如何被影響。反而好多交易都係你生活上容易理解同埋接觸既事務。所以對於抽象思維稍弱，但願意理解既同學係有優勢。
3. 喜歡評分標準較客觀嘅同學
會計題目通常有較明確答案同評分方向。
文科類科目 / 寫 Essay 既科目難免有一個情況，係Marking 涉及主觀判斷。你遇上不同Marker，會好直接影響你既得分。
相比之下，BAFS 評分當中數字比重佔多，較少出現「唔同 marker 對同一段文字有唔同理解」嘅情況。當然，個別marker 眼大睇過龍呢類情況仍然係不能避免。
如果你偏好清晰、客觀、可預測嘅評分模式，BAFS 會計會較合你胃口。
4. 希望考試途中有方法檢查答案嘅同學
會計有一個特點：好多題目喺考試途中其實有方法自己 check 答案。
例如數字是否平衡、財務報表是否合理、某啲計算是否互相配合。
對於鍾意即場確認自己有冇做錯嘅同學，呢點會幾吸引。
5. 理科基礎較弱，但又唔想走純文科路線嘅同學
如果你覺得 Phy、Chem、Bio 太抽象，文科又要寫太多字，BAFS 會計可以係一個中間選擇。
佢有數字、有邏輯、有步驟，但唔需要高階數學能力。
佢有數字、有邏輯、有步驟，但唔需要高階數學能力。
❌ 未必適合選 BAFS 會計嘅同學
1. 只想靠背書拎基本分嘅同學
如果你偏好背熟內容，然後用文字作答去拎分，BAFS 會計未必係最舒服嘅選擇。
相對而言，經濟或者地理可能會較容易提供一部分可背誦嘅基本分。
2. 大學目標係理科、醫療或工程類課程嘅同學
如果你將來目標係醫療、理科、工程等課程，你可能需要將選科 quota 留畀 Phy、Chem、Bio、M1/M2 等科目。
呢類課程對選修科目要求較明確，選科時要更加小心。
3. 純文科人，完全唔想接觸數字嘅同學 / 對加減乘除已經去到「憎恨」水平嘅同學
BAFS 會計雖然唔需要高階數學，但始終需要長期處理數字、表格、計算同分類。
如果你連加減乘除百分比見倒都會反胃，咁建議你避之則吉。
(下集待續...)