《【DSE BAFS操卷全攻略】｜時間分配｜答題方法｜考試技巧分析》

開學頭幾個星期，最容易出現一個情況：學校第一次測驗派返嚟，會計有啲題目明明上堂聽過，返屋企慢慢做亦識，但一到限時就亂；Paper 1 個案題寫咗一大段，自己覺得「有內容」，分數卻未如理想。於是第一個反應通常係：係咪應該再做多啲 Past Paper？

Simon Sir 喺 Free Talk 最想學生先改變嘅，正正係呢個思路。佢嘅課堂重點唔係逐個課題重新教一次，而係集中處理一啲真正影響考試表現嘅能力：點樣準備、點樣分配時間、點樣判斷題目要求、點樣取捨，以及做錯之後應該點檢討。當中「會計邏輯」係基礎——唔係背一套固定做法，而係知道每一步點解要咁做，去到陌生題目都識得判斷。

操卷第一步：先搞清楚點解失分，而唔係逐個課題重讀

好多同學一開始操 BAFS 會選擇做完整試卷，交換日校之間嘅 Mock 或者考試題目，然後全卷操練。對答案就發現：「錯好多」或者「我識㗎我只係唔夠時間做」。下一步就會覺得係自己操得唔夠，再操更多就能夠解決「時間唔夠」嘅問題。

雖然時間唔夠的確係同學常犯嘅錯誤，但係更大嘅原因或者更多嘅可能性，可以係同學有部分概念本身學得唔清晰，有時係睇漏題目一啲關鍵字眼、日期，或者係題目提及嘅特別條件。

同學只係憑分數高低比自己一個感覺，覺得自己做得好或唔好，但根本唔知道自己真正唔識嘅內容係乜嘢。喺未能夠對症下藥嘅情況之下，溫再多嘅書、操再多嘅卷，都係無補於事。所以好多同學都唔係懶，只係佢未搵到正確嘅方法去提升自己嘅考試表現。

針對呢個情況，Simon Sir 課堂會將重點放喺「思維模式」、「概念」、「做數 Work Flow」而不限於「課程內容要求學習的內容」。遇到會計題，佢會要求學生用「人話」講得通個邏輯：題目畀咗咩資料？而家要判斷咩？呢一個日記分錄（Journal entries）背後係點解咁做？題目嘅條件改變會點樣影響你嘅答案？能夠用自己嘅語言解釋原因，先代表真係掌握，而唔係只係認得一個做法。

​

圖一：唔睇答案，用「人話」答得出呢四條問題，先叫真係掌握。

練習安排亦一樣要有目的。前期可以用 By-topic 題目集中驗證某一類失分位，尤其 Paper 1A MC；到基本概念同答題判斷穩定之後，先用 By-year 整份計時，練考場節奏。但係你要留意，2025 年或之後嘅 by-year past paper 先適合你目前應考嘅課程。

​

圖二：By-topic 用嚟集中找出失分位，By-year 用嚟練整卷節奏；兩者目的唔同。

Paper 1 必修：MC 要優先處理，Case 題唔係寫得多就有分

Paper 1 最常見嘅誤區，係學生覺得 Short Question 要寫字，所以「好似重要啲」，要操寫字寫得好熟。事實係，Paper 1A 總分 72 分當中，48 分屬於選擇題 MC，只有 24 分屬於短答題。更甚者，BAFS 嘅 MC 係每題 2 分而不是每題 1 分，非常昂貴！因此，溫習時間同操練重心應該要更多放在 MC 之上。

​

圖三：Paper 1A 一個鐘嘅分數比重同落場時間分配。

操 MC 最有效並非 By-year 做然後核對答案，而係 By-topic 集中做。每一個 topic 都專注於各類考核陷阱，確保自己知道「點解 A 啱」之外，都知道「另外幾個選項錯喺邊」。如果考評局要玩變化，佢呢一個句子可以點樣由一個正確嘅陳述改成為一個錯誤嘅陳述？因為真正嘅概念漏洞，往往就藏喺你排除錯誤選項嗰一下。真正落場時，肯定嘅 MC 高速完成。任何唔肯定嘅題目先圈低，最後再考慮用 MC 答案分佈法去判斷。

至於 Paper 1A 短答題部分，共有三題，每題八分，分別對應住三個部分：Business Environment（營商環境）、Personal Finance（個人理財）、Introduction to Management（管理導論）。根據 2025 同埋 2026 年兩年嘅經驗，題目都冇設計成「4 分 + 4 分」呢類需要寫比較多解釋嘅情況。

試卷通常都會有一至兩分嘅題目係 State（舉出）嘅題目。呢一類題目嘅答案唔需要寫太長，你能夠正確指出相關嘅概念或者關鍵字眼，已經能夠得到分數。

至於 4 分嘅題目，多數係解釋兩個項目，例如遵守某個有效管理原則 principle of effective management 嘅好處，或影響企業商業決定嘅兩個外在環境因素 external factors。針對呢類題目，考評局在過往試後簡報會多次強調答案必須針對個案情境。因此，如何在作答時緊扣個案情境就係同學需要鍛鍊嘅位置。關於緊扣個案呢一點，同學可以通過呢一個 Giveaway 窺探一下：【企業擁有權類型】

Paper 1A 考試時間只有一個鐘，可謂非常緊迫。同學可以目標用 20 分鐘內完成 MC 選擇題部分，預留最少 30 分鐘時間完成短答題部分。剩下的 10 分鐘可視乎實際情況覆核 MC 答案，或用於審視短答題的答題邏輯是否足夠嚴謹、是否有舉出和個案相符的例子。

Paper 2A ：唔好一開波就「打大佬」，按目標 Grade 先決定點操

Paper 2A 係不少同學感到挫敗的位置。挫敗感主要源於：

1. 剛剛接觸嘅時候覺得原理好簡單，無非就係畫 Account、做三份表，全部有格式可以抄

2. Period-end adjustments 期末調整開始加入不同的變化，有複雜嘅案例出現

3. Correction of errors 錯誤更正、Incomplete records 不完整紀錄呢類課題高度依賴之前學習過嘅內容。只要曾經底子唔穩，呢啲「大佬級」課題就顯得更深更難。

4. Cost Accounting 成本會計又突然去咗另一個世界，唔係寫 Journal 日記分錄或者畫 T-account，需要重新適應。而且大部分學校中五下學期甚至中六先教，相比其他課題操練時間較少

​

圖四：Paper 2A 嘅難度唔係突然變難，係一級一級疊上去。

另一群同學嘅挫敗就源於明明自己好努力，但分數都係無提升。有做 DSE Past Paper，做嘅過程唔識就睇睇 Marking，比「靈感」自己，再閂埋 Marking 繼續做。呢一種方式我形容為「欺騙自己的努力」。以為自己有溫而且識做，但最後只係背誦咗 Marking 嘅一啲做法。題目類型一轉，或者有新項目出現，就企咗喺度不知所措。

​

圖五：有做卷、有對答案，但分數一直冇郁，多數係呢個原因。

Simon 建議操練時應注意：

1. 理解課程內容及每課常見考法：教科書練習同埋考評局題目有時活在兩個世界。努力之前，首先請確保你係向考評局考核方向努力。

2. 從基礎出發：以其中一個課題 Limited Companies 有限公司會計為例，好多同學呢課得分低就以為係呢課概念唔清晰，所以不斷花時間操練呢一課。事實係，呢課首次接觸嘅學習內容主要關於財務狀況表嘅股東權益 Shareholders' Equity 部分，同埋每一年嘅 Retained profits 留存利潤如何受影響。絕大部分同學呢課表現一般係因為呢課將錯誤更正同埋期末調整一次過放在一條題目入面。所以同學真正要溫習嘅係前端嘅基本功課題，而不是不停操練有限公司題目。

3. 留意字眼更新：BAFS 其中一個麻煩位置係每一年考評局嘅 Briefing 都會有評改邏輯更新。例如 "Accrued interest income" 應計利息收益係曾經接受嘅帳戶名稱，但 2025 年之後就需要用 Interest income receivables 應收利息收益。呢一系列變動並非因為會計準則嘅變化而修訂，而係考評局有自己的一套想法。如果你操練舊試題、睇舊 Marking、跟舊字眼，你就會跌入「曾經有分，但現時無分」嘅陷阱。

4. 習慣寫 Workings 草算：Paper 2A 題目有部分數字係需要較多步驟先能夠成功計算。而呢個多步驟計算嘅數字往往有 1.5–2 分。如果考生無寫 workings 草算而數字答案錯誤，則會直接得 0 分。好多 Level 5+ 嘅真跡試卷顯示，同學都會寫低計算步驟，即使最終答案錯誤都能夠保住分數。

​

圖六：以有限公司會計為例——低分未必等於嗰一課唔識。

另一個 Simon Sir 好重視嘅原則，係「以學生目標為本」。唔係所有同學都以 5** 為目標。如果同學目標係 Level 4–5，的確可以適當地在做題目嘅時候捨棄某啲分數。但係落場嘅時候應該點樣判斷？乜嘢題目屬於常見、乜嘢題目屬於罕見，係需要日常訓練去判斷的。Simon 嘅課堂除咗知識之外，都會同同學區分不同考核點嘅難度，比目標有異嘅考生自行判斷自己應該學幾深入、做幾多、溫幾多。

所以，真正有意思嘅學習並唔係對答案之後得出一個分數就停手，而係要明確追蹤自己嘅錯係源自於概念錯、唔小心，定係我目標嘅分數根本係允許放棄呢一個部分嘅分數。咁樣學習同埋溫書，先會令自己同目標越嚟越近。