約埋幾個同學一齊溫地理，出發點通常都幾好——大家可以互相提醒、有商有量。但現實係，好多時傾傾下就變咗吹水大會，一個下晝過去，翻開本書仍然係嗰幾頁。
唔係一齊溫書呢個諗法錯，而係冇個「玩法」，自然就散晒。
分享幾個實用做法，等大家一齊溫都可以溫得有效率。
一、開波之前，先講清楚今日溫乜
唔好一坐低就自動波咁「開始溫啦」，咁樣好易你溫緊呢頁，佢溫緊嗰頁，最後淨係得把口交流。
約定之前，每人先話畀大家知，自己今日想搞掂邊個議題，或者想完成邊條 past paper 題目嘅答案大綱。
有個具體目標，先唔會愈傾愈遠。
例子：今日我哋要完成 E1 動態地球嘅 rocks 嘅溫習，同埋相關嘅歷屆試題嘅 essay
二、輪流「教」，唔係輪流「講感想」
一齊溫最大優勢係可以互相檢查有冇識，唔係齊齊吐苦水。
可以試吓輪流做「小老師」：一個人負責用自己說話解釋一個概念俾其他人聽，其他人負責挑錯處、問問題。呢個過程好快就會暴露邊個環節大家其實都未搞清楚，比自己一個人溫更加快發現盲點。
例子：今日由 Jaden 負責教 Greenhouse effect 嘅過程同埋注釋圖，而另外三位負責做學生，以及針對聽唔明嘅部分重新提問。
三、先各自答，先討論
一齊做 past paper 題目，千祈唔好一開始就互相討論，因為咁樣好易變成一個人講晒，其他人淨係抄。
正確做法係：限時各自寫低答案，時間到先攤出嚟比較。答案唔同嗰啲位，先係最值得傾嘅地方——究竟邊個角度先啱，定係兩個角度都得，只係表達方式唔同。
四、用計時器分段，唔好無限延長
冇時間界線嘅溫習，好易由溫書漸漸過渡去傾偈。建議每節設定固定時長，例如 45 分鐘專注溫習，跟住 10 分鐘自由傾（呢段時間先真係可以吹水），交替進行。休息時間有咗名份，反而唔會侵佔溫習時間。
例子：45 分鐘之內温習三種岩石嘅香港分布、形成過程以及特徵。之後 10 分鐘就去互相交流，睇吓有咩位唔太明白，或者分享背誦嘅心得。
朋友一齊溫書本身係好事，關鍵在於有結構，唔係齊齊坐低就自動有效果。試吓下次約溫書之前，先定好今日玩法，睇下效果有冇唔同。
想知自己嘅溫習方法仲有咩可以執？歡迎 WhatsApp 明道，交低你最近做過嘅一題ESSAY (無論喺功課、測驗或者考試都係，最好就係Past Paper)，等TITUS幫你免費改以及寫返一份詳盡報告俾你，幫你睇下實際仲差啲乜俾返精準嘅意見俾你呢！
免費資源：【SEND ESSAY PDF 去 +852 6976 7698】
想直接傾：WhatsApp 明道教育