好多同學覺得 BAFS 會計難記，唔係因為佢深，係因為佢「同自己無關」。一個中五學生，未開過公司，未出過糧，你叫佢記住「預付費用係資產」，佢只可以死背。背到測驗嗰日，一轉個問法就唔識。
我係 Simon，教 BAFS 會計。我曾經喺會計師樓入邊工作。教書之後發現一件事：會計每一個概念，其實你早就喺日常生活做緊，只係冇人同你講嗰個叫咩名。買波鞋、儲錢、幫屋企睇下今個月使咗幾多，全部都係會計。所以呢篇文唔係逐個概念解俾你聽，而係教你一個習慣：點樣自己幫每個概念搵一個生活例子。呢個習慣學識咗，之後每一課都用得著。
「搵例子」係一個習慣，唔係一個技巧
技巧係用一次就算，習慣係每次學新嘢都自動做。我叫學生上完每一課，做三步：
步驟 | 做咩 | 例子 |
一句話 | 用自己嘅話講一次個概念，唔准抄書 | 「折舊即係件嘢用得耐咗，唔值咁多錢」 |
搵一件事 | 問自己：「我今個月有冇做過類似嘅嘢？」 | 「我對波鞋著咗半年，賣出去一定唔係原價」 |
寫落邊 | 將嗰件事寫喺筆記嗰個概念旁邊，一句就夠 | 筆記「Depreciation」旁邊寫「波鞋」 |
重點係第二步一定要係你自己嘅事。書本例子係「公司買咗一部機器」，你冇買過機器，記唔入腦。但你買過波鞋，你知道著舊咗係咩感覺。個例子越貼身，記得越深入。
第三步好多同學跳過，覺得「記住就得」。但考試嗰日你唔會記得，你會記得嘅係筆記入邊嗰個字。所以一定要寫。
三個示範：買波鞋、儲錢、幫屋企睇數
用返上面三步，我示範三個最常見嘅生活情境，你會發現一個情境可以掛住唔止一個概念。
生活情境 | 對應嘅會計概念 | 一句記法 |
買咗對波鞋 | 資產（asset）、折舊（depreciation） | 對鞋係我嘅資產，但一路著一路貶值 |
儲錢 | 資產同收益嘅分別 | 儲落嘅錢既結餘係資產； |
交咗下個月電話月費 | 預付費用（prepayment） | 錢俾咗，服務未用，所以仲係資產 |
用咗成個月電，張單未到 | 應計費用（accrual） | 電用咗，錢未俾，所以已經係負債 |
借錢俾同學，佢話遲啲還 | 應收款項、壞賬（bad debts） | 佢還得起係資產；佢走佬就係壞賬 |
幫屋企睇下今個月使咗幾多 | 損益表 vs 財務狀況表 | 今個月出入係損益表；屋企有幾多錢幾多債係財務狀況表 |
留意「幫屋企睇數」嗰行。好多同學到中六都分唔清損益表同財務狀況表，其實用屋企做例子一句就講得清：今個月人工同開支，係「呢個月發生咗咩」；屋企有幾多存款、仲欠幾多按揭，係「呢一刻有幾多」。前者由損益表反映，後者係財務狀況表反映。你屋企每個月都做緊呢兩張表，只係冇印出嚟。
如果想睇多啲我平時點拆概念，可以先攞 BAFS 會計免費資源合集。
例子記得，數做唔到？最後一步唔可以慳
到呢度要講句老實話：例子只係記憶嘅入口，唔係答案。DSE 會計卷好少淨係問你「折舊係咩」，多數係俾一堆數字你，要你計出折舊額，再入返損益表同財務狀況表。所以搵完例子之後，仲有一步。
我叫學生做嘅係：每個例子旁邊，補返一條最簡單嘅數。「波鞋」旁邊寫「成本幾多、用幾年、每年折舊幾多」，用考評局款式嘅答題簿手寫一次。唔使複雜，一條夠。目的係將「我明」變成「我識做」，呢兩樣嘢中間嘅距離，就係好多同學失分嘅位。
仲有一樣，例子唔好搵太多。一個概念一個例子，一個你最有感覺嘅。搵五個等於冇搵，因為考試嗰日你會記唔起邊個先係。
我平時同學生講：「你唔係唔識會計，你係未發現自己一直做緊會計。」由今日開始，每上完一課，用返上面三步，一個星期之後你會發現筆記邊全部都係你自己嘅嘢。
如果你想有人幫你睇下自己諗既概念同埋例子係咪匹配，可以由最簡單嗰步做起：
- 先攞 BAFS 會計免費資源合集。
- 將最近一次學校測驗卷或成績 send 俾我，免費錯題分析兩日內回覆，你會知道自己係概念不清定係唔小心。
- 想試堂，有兩個安排：親身到佐敦問 admin 攞 iPad 睇體驗課堂錄影（約 1 小時 45 分鐘），當日教學筆記可以帶走；或者直接參與 Live 常規課堂。WhatsApp Simon 問下 BAFS 試堂。
常見問題 FAQ
1. BAFS 用生活例子理解，對考試有咩幫助？
生活例子可以幫助同學先理解抽象概念背後嘅實際意思，尤其當題目改變情境或問法時，會較容易將概念套用到新情況。不過，理解生活例子之後，仍然要熟習 BAFS 正式術語及答題要求。
2. BAFS 每學一個 Concept，點樣自己搵生活例子？
每學完一課，可以先用自己嘅說話講一次 Concept，再問自己今個月有冇做過類似嘅事情，最後將呢個生活例子寫喺筆記嘅 Concept 旁邊。一個 Concept 可以配一個例子，而且最好係自己最有感覺嘅例子。搵太多例子，反而可能令考試時記唔起邊個先係最重要。
3. BAFS 有咩概念可以用日常生活理解？
例如買波鞋可以理解資產及折舊；儲錢可以理解資產與收益嘅分別；預付電話費可以理解預付費用；未交電費可以理解應計費用；屋企收入、開支、存款及債務，亦可以用嚟理解損益表與財務狀況表。
4. BAFS 商業管理題點樣由「識個 Concept」變成「識應用」？
可以由三步開始：先講清楚 Concept 係咩，再解釋點解，最後將 Concept 套返入題目提供嘅企業或商業情境。呢種「Concept → 解釋 → 情境應用」嘅方式，比單純背定義更接近實際答題要求。
5. 點解有時明明識 BAFSConcept，遇到新題目仍然唔識答？
可能係由「記得概念」到「識應用」中間仍然欠缺一步。尤其當題目換咗企業、情境或問法時，如果只係靠背誦原本例子，就未必識判斷。溫習時可以刻意練習同一 Concept 嘅不同情境，訓練自己由題目資料反推應用方向。